सिमसारको आम्दानी, विकासमा लगानी

बिर्तामोड, झापा जिल्लाको अग्रणी पर्यटकीय स्थलको रुपमा परिचित जामुनखाडी सिमसार तथा पर्यटकीय क्षेत्रले स्थानीय उपभोक्ता क्षेत्रमा विकासका कामहरु गर्दै आएको छ ।
जामुनखाडी सामुदायिक वन उपभोक्ता समूहले सञ्चालन गर्दै आएको सिमसार र पर्यटकीय क्षेत्रबाट बार्षिक रुपमा एक करोड रुपँया भन्दा धेरै बजेट समुदायको विकासमा खर्च गर्दै आएको छ ।
विरामी हुँदा अरु अस्पताल जान्छन् । तर, जामुनखाडी सामुदायिक वन उपभोक्ता क्षेत्रका विपन्न परिवार भने बन कार्यालयमा जाने गर्छन् । केही बर्षयता अति विपन्न परिवारलाई सामुदायिक बनले उपचारमा सहयोग गर्न थालेपछि त्यस क्षेत्रका उपभोक्ता विरामी हुँदा अस्पताल जानुभन्दा पहिले उपचारका लागि सहयोग लिन वन कार्यालय जाने गर्छन् ।
समूहले उपचार खर्चमा पछिल्लो तीन बर्षमा आठ लाख २४ हजार खर्च गरिसकेको छ । बिजुली नहुँदा पहिला माझी टोल र दमाइ गाउँमा टुकी बाल्नु पथ्र्यो । तर, दुई वर्षयता यस्तो बाध्यता हटेको छ । समूहले सोलार बत्ती जडानमा ३० लाख ८४ हजार खर्च गरेको छ । सिमसारको आम्दानीबाट सडक ग्राभेल, कालो पत्रे, ढल निर्माण, विद्यालय सञ्चालनमा अनुदान, सिप विकास, गोवरग्याँस प्लान्ट, शौचालय निर्माणमा गरी दुई करोड ८९ लाख खर्च गरिसकेको छ ।
झापाको कन्काई नगरपालिका १ र २ स्थित जामुनखाडी सिमसारले गरिबी न्यूनीकरण तथा सामुदायिक विकासमा वर्षेनि एक करोडभन्दा बढी बजेट खर्च गर्दै आएको छ । २०५२ साल स्थापना भई २०६५ साल देखि सिमसार तथा पर्यटन सञ्चालन गरेपछि जामुनखाडीले आम्दानीको एक तिहाई सामाजिक उत्तर दायित्व अन्तर्गत स्थानीयको विकासमा खर्चिने गरेको सामुदायिक वनका अध्यक्ष ख्यामराज सिटौलाले बताउनुभयो ।
चार सय ३४ हेक्टरमा फैलिएको सामुदायिक वनमा छ सय ८४ घरधुरीका उपभोक्ता आबद्ध छन् । उनीहरू मध्ये दुई सय २१ घरधुरी न्यून तथा एक सय ८५ घरधुरी विपन्न र अतिविपन्न परिवारका छन् । स्थानीय क्षेत्रमा सामुदायिक वनले गरेको यी कार्य उदारणीय बनेको छ । त्यस्तै विकास र सहयोग झापाका अन्य ५९ वटा सामुदायिक बन र सिमसार क्षेत्रमा पनि हुने हो भने जिल्लाको विकासमा निक्कै टेवा मिल्ने बन क्षेत्रका अगुवाहरुको भनाइ छ ।